Connect with us

ព័ត៌មានជាតិ

សូមជ្រាបឲ្យច្បាស់បងប្អូន ចៀសវាងមានការខុសឆ្គង ! ការ​ប្រើ​ពាក្យសម្ដី​ប្រមាថ​សមត្ថកិច្ច​ គឺ​អាច​ជាប់​ពន្ធ​នា​គារ​ ពី១​ថ្ងៃ​ទៅ​៦ថ្ងៃ

ភ្នំពេញ៖ ដូចបងប្អូនបានជ្រាបរួចមកហើយ នាថ្ងៃទី០១ ខែឧសភា ឆ្នាំ២០២០ នគរបាលចរាចរណ៍​កម្ពុជា ​បាន​អនុវត្តវិធានការ​រឹតបន្តឹង​ច្បាប់ចរាចរណ៍​ផ្លូវគោកជាមួយការ​ផាកពិន័យ​ធ្ងន់ធ្ងរ​។ ជាមួយគ្នានេះដែរ មានពលរដ្ឋជាច្រើនហាក់មិនពេញចិត្ត នឹងវិធានការ​រឹតបន្តឹង​ច្បាប់ចរាចរណ៍​ផ្លូវគោកដែលបានដាក់ចេញមកនេះ មិនត្រឹមតែប៉ុណ្ណោះមានមហាជនមួយចំនួនតូចបានបញ្ចេញមតិ ក៏ដូចជាសម្ដីរិះគន់ខ្លាំងៗ នៅលើបណ្ដាញសង្គមហ្វេសប៊ុកទៅលើប៉ូលីសចរាចរណ៍ ដោយហេតុនេះហើយបានធ្វើឲ្យនាយកដ្ឋាននគរបាលចរាចរណ៍ និងសណ្ដាប់ធ្នាប់សារធារណៈនៃអគ្គស្នងការនគរបាលជាតិ បានអះអាងនៅថ្ងៃទី៣ខែឧសភាថា ការប្រើប្រាស់ពាក្យសម្ដីប្រមាថ ធ្វើឱ្យប៉ះពាល់កត្តិយសសមត្ថកិច្ច ដែលអនុវត្តច្បាប់ គឺជាបទល្មើសមួយ ដែលអាចជាប់ពន្ធនាគារពី១ថ្ងៃ ទៅ៦ថ្ងៃ។

ការបញ្ជាក់ពីនាយកដ្ឋានបែបនេះ បន្ទាប់ពីមានស្រ្តីម្នាក់ជាអ្នករួមដំណើរនៅក្នុងរថយន្តម៉ាកព្រុសមួយគ្រឿង បានLiveតាមគណនីហ្វេសប៊ុកឈ្មោះ Ravy Khmer ដោយបានប្រើពាក្យសម្តីប្រមាថ និងសរសេរលើCaptionថា«ចោរស្របច្បាប់ មិនបាច់និយាយក៏គេដឹង» ដែលជាការប្រព្រឹត្តិល្មើសនឹងមាត្រា៧៣ ការរំលោភលើរាងកាយ កិត្ដិយស សេចក្ដីថ្លៃថ្នូរ របស់មន្ត្រីអនុវត្តច្បាប់ចរាចរណ៍ផ្លូវគោកដែលកំពុងបំពេញភារកិច្ច ត្រូវផ្តន្ទាទោសតាមក្រមព្រហ្មទណ្ឌជាធរមាន(មាត្រា៥០២ បទប្រមាថ ត្រូវផ្ដន្ទាទោសដាក់ពន្ធនាគារពី ១ថ្ងៃ ទៅ ៦ថ្ងៃ។

ស្រ្ដីរូបនោះបានLive វីដេអូ បន្ទាប់ពីខឹងមន្រ្តីនគរបាលចរាចរណ៍នៅខេត្តកំពង់ធំ ដែលបានផាកពិន័យរថយន្តរបស់នាងចំនួន១៥ម៉ឺនរៀល ខណៈនាងអះអាងថា ដោយសារតែខូចភ្លើងអំបូលមួយ។ ស្រ្ដីរូបនេះ ត្រូវមន្រ្តីព្រមានអនុវត្តតាមច្បាប់ ប្រសិនបើមិនចូលខ្លួនមកដោះស្រាយជាមួយសមត្ថកិច្ចចំពោះការប្រើប្រាស់សម្ដីប្រមាថនេះទេ។

គួរជម្រាបថា ចាប់តាំង​ពីថ្ងៃទី ០១ ​ខែឧសភា​មក ​គឺរយៈពេល៦ថ្ងៃ​ហើយ​ ដែល​នគរបាលចរាចរណ៍​កម្ពុជា ​បាន​អនុវត្តវិធានការ​រឹតបន្តឹង​ច្បាប់ចរាចរណ៍​ជាមួយការ​ផាកពិន័យ​ធ្ងន់ធ្ងរ​។ ជាការកត់​សំគាល់ ​រយៈពេល៦​ថ្ងៃមក​នេះ ​អ្នកឃ្លាំមើល​សង្គមបាន​រិះគន់​វិធានការ​ផាកពិន័យ​ថា ​នឹងមិន​អាចកាត់បន្ថយគ្រោះថ្នាក់​ចរាចរណ៍​បាននោះទេ ​បើប្រជាពលរដ្ឋ ​និង​អាជ្ញាធរ​មិនកែប្រែឥរិយាបថ​របស់ខ្លួន​ជាមុនទេនោះ​ ៕

Advertisement